Bismillah, valhamdulillah. Savolingizga mana bu hadisi sharifdan javob olish mumkin.

عَنْ أَبِي هُرَيْرَةَ أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ قَالَ: خَيْرُ الصَّدَقَةِ مَا كَانَ عَنْ ظَهْرِ غِنًى وَابْدَأْ بِمَنْ تَعُولُ. رَوَاهُ الْبُخَارِيُّ وَالنَّسَائِيُّ وَأَحْمَدُ.

    Abu Hurayra roziyallohu anhudan rivoyat qilinishicha, Rasululloh sollallohu alayhi va sallam shunday deganlar: “Eng yaxshi sadaqa ortganidan qilinganidir. Sen o‘z qo‘l ostingdagilardan boshla!” (Buxoriy, Nasoiy va Ahmad rivoyati).
    Agar odam boy-badavlat bo‘lsa, odamlarga infoq-ehson qiladi, sadaqalar beradi. Agar o‘rtahol yoki kambag‘al bo‘lsa, o‘zi oilasidan boshlaydi: ota-onasi, ayoli va farzandlarini kerakli narsalar bilan ta’minlaydi. Ahli ayoli muhtoj bo‘la turib o‘zgalarga “ehson” qilinmaydi. Birinchi galda o‘z oilasidan boshlanadi.
    Shundan kelib chiqib, maoshingizni eng avval ota-onangiz, xotiningiz va farzandlaringiz uchun sarflaysiz. Ortsa, aka-uka, opa-singillarga sadaqa qilasiz. Agar juda ortib qolsa, keyin boshqalarga infoq qilsangiz bo‘ladi. Sharti shuki, sadaqa qilish uchun inson avval o‘z oilasini ta’minlab qo‘ygan bo‘lishi kerak. Vallohu a’lam!